Адам құқықтары жөніндегі уәкіл Артур Ластаев жұмыс сапарымен Атырау қаласындағы әйелдерді ұстауға арналған орташа қауіпсіздік деңгейіндегі №79 түзету мекемесіне барды.
Бұл сапардың мақсаты – сотталған әйелдердің құқықтарының сақталуын және олардың ұсталуының халықаралық актілерде көзделген ең төменгі стандарттарға сәйкестігін тексеру.
Омбудсмен жазасын өтеп жатқан әйелдердің отрядтағы тұрмыс жағдайымен, бос уақытты өткізуімен, тамақтануымен және медициналық көмек сапасымен танысты.
Сондай-ақ Артур Ластаев мекеме аумағындағы тігін цехы мен наубайханаға да барды. Қазіргі таңда мекеме аумағында 123 сотталған әйел еңбек ететін 12 жеке кәсіпкерлік субъектісі жұмыс істейді.
Мекеме жанында колледж де жұмыс істейді. Биыл онда 26 кондитер, 20 аспаз, 22 шаштараз және 23 тігінші диплом алған.
Сапар аясында Уәкіл сотталғандармен жеке қабылдау өткізіп, оқшаулау жағдайында отырған әйелдердің жағдайын жақсарту бойынша қабылданып жатқан шаралар туралы айтты.
Ол «Қазақстан Республикасы Конституциясының 30 жылдығына байланысты рақымшылық жасау туралы» Заңында айтылып өткен әйелдерге, оның ішінде балалары бар аналарға және басқа да әлеуметтік осал топтағы адамдарға рақымшылық жасау туралы Омбудсмен институты тарапынан ұсыныстар енгізілгенін атап өтті.
Іссапардың қорытындысы бойынша мекеме әкімшілігіне сотталғандарды ұстау жағдайларын халықаралық стандарттарға сәйкестендіру жөнінде ұсынымдар берілді.